|
呢两日无波睇…唔系…应该话唔驶睇波至啱，谂住可以早啲瞓，瞓番觉好既，点知原来瞓唔到，半夜一两点仲精神过鬼，要上网解闷，上完网就睇“24”DVD，系都要到五六点先瞓到，睇嚟呢个情况都仲会起码持续多一个礼拜，希望各位好彩过我，无呢个世界杯后遗症。
32队只有一队可捧杯，即系话有31个国家既球迷会失望，相信最失望既应该系主场既德国球迷，6月9日之前佢哋本来对国家队唔会抱太大期望，因热身赛表现不佳，点知第一场对哥斯达黎加就判若两队，跟住再连赢波兰、厄瓜多尔同瑞典，对阿根廷嗰场更加令国民情绪推向高峰，当时我身在柏林，周街都系着住波衫既德国人，去到边度都听到佢哋讲德国队啲威水嘢(虽然我唔识德文但睇表情都feel到估到)，就系呢啲气势唔多唔少帮助佢哋入四强，对意大利嗰场正当所有人都认为会重演几日前射赢十二码，然后入决赛时，竟然喺第118分钟失波，由无希望到有番希望到充满希望到绝望，我谂世界上唔会有一盘冷水冷得过呢盘！
惨中之惨可能系几经辛苦扑到两张决赛飞既主场球迷，都唔知去唔去好。 |
