施丹确有王者风范

　　施丹果然系施丹，有时真系唔到你唔服，记得世界杯啱啱开波，睇咗法国头两场波，都觉得佢哋真系完全无态，谂住佢哋年纪又大，出到线真系要偷笑，但谂唔到佢哋愈打愈劲，施丹不愧系球王级人马，一传一顶都真系令人顺服，近两场佢o既表现更加俾人觉得系玩杂技，实在出神入化，而且睇佢射个球12码几啖老定，完全信心爆棚，讲真虽然我唔系佢球迷，但都好想佢系世界杯有个完美结局，听讲佢打完今届世界杯就退休，相信冠军对佢嚟讲好有意义。

　　当然我喺法国同意大利两队作一选择，我会较偏向意大利多啲，因为佢哋系今届俾我o既印象好深，特别系逆境波打得好出色，加上又多靓仔，仲有我啱啱发现佢哋件球衣都好靓，数数吓支持佢哋o既元素好似多一啲，但当然我唔系属于死硬派o既人，总之两队打场好波就系最重要。