保方大战巴夫斯

　　经过咗廿几日62场波，世界杯最后决赛o既队伍终于产生，意大利对法国，赛前有几多人估到？

　　16强无咗荷兰西班牙，8强无巴西阿根廷英格兰，4强无埋德国，赛前大热次热总之系热o既都已经返哂屋企，除咗德国，因为根本就系喺自己屋企！意大利同法国都有个共通点，就系开赛俾人睇低，跟住就越踢越好，唔觉唔觉又做瓜一队，唔觉唔觉又4强决赛，另外就系两队防守同样顶瓜瓜，法国只失过一球比朴智星，一个十二码比西班牙，意大利仲劲，只失过一个鸟龙波。

　　讲番法葡大战，喺TVB节目内有嘉宾批评法国踢法保守，唔够悦目，我又唔系咁睇，我反而劲钟意睇施丹，踢波好似玩魔术咁，处理嗰球十二码o既决心同技术，希望英格兰球员有录低得闲就攞出嚟慢镜重播温习吓，34岁o既老人家有咁o既水准真系难得。

　　唔明史高垃利做乜换出保列达换入沙保沙，将C朗推上去打箭头，变相将C朗作用减到零，后尾仲要用个后卫美拿打中锋，大佬呀，输紧一球喎，要换都换入般莫迪或者纽奴高美斯呀，最后连运都输埋，巴夫斯送大礼都唔到，注定出局。

　　好想睇决赛射十二码保方大战巴夫斯！