昨晚系第一晚系奥海城做通宵睇波节目，虽然无德国既露天睇波场咁大咁多人咁多野玩，但都真系几好气氛，始终睇波都系一齐睇一齐嗌过瘾的。

　　讲番场波，赛前个个都认为意大利实力比较平均，但个个都认为德国会入决赛！尤其九十分钟两队无波入之后，我谂连奇连士文一的都唔介意射十二码，反正射亲都赢，如意算盘只差两分钟就可敲响，派路一个毒到无可再毒既no look pass，加上一脚靓到无可再靓既射门，咁就搞掂左烈文，后尾迪比亚路个脚就只不过系“棺材上面加口钉”，死刑一分钟前已经判左。

　　不得不佩服银狐纳比，后段换入伊亚昆达、基拿甸奴同迪比亚路，三个都起到决定性作用，反观德国，唔系奇连士文唔掂，而系的后备唔掂，奥当高得个快字，脚法同出波跟本未够班，舒韦恩史迪加如果系掂系得既之前几场做正选就唔会被换走，非常同意马图斯既讲法，呢队德国同90年既冠军队真系有一段距离，真正优秀既A级战将不多，能够踢到呢个阶段已有所交代。

　　题外话，咋晚又见到何丽全何生，佢同我讲：“一早都话巴西唔得啦，好彩之前你写左出嚟！”何生，咁决赛你睇好边队？等我买番一百几十呀！