睇完两场现场波返黎，终于有机会系电视上睇番英葡场波既片段，因现场虽然设有大电视，但所有犯规动作、红黄牌、有无越位、有无过白线等敏感镜头通通都唔会做即时重播，费事有咩事球证判错既时候引起现场球迷过份争议，总之就死无对证，你返屋企睇到就你既事，过左海就神仙！

　　所以系现场我其实唔系睇得好清楚点解朗尼会攞红牌，完左场波仲要打番黎问“娘炳”，后尾返黎先睇清楚原来佢踩人“细佬”，仲推C朗，讲起C朗就火，由开波到完场完全无当过英格兰既曼联队友系兄弟，虽然话国家为重各为其主，但都唔驶去到咁尽，故意挑起朗尼把火，入完最后个球十二码个样仲寸过“码头咕喱”，完左场亦唔觉有主动安慰任何英格兰球员，或者系更衣室有我睇唔到啦！睇黎佢都无谂过再返奥脱福，而我屋企件C朗签名曼联波衫都系时候要收埋。

　　葡萄牙有无机会入决赛？其实四队实力非常接近，打到呢个阶段根本无强弱之分，睇下边队运气好啲就赢，报纸话我改捧德国，悔气说话啫，我心目中既世界杯系七月一日已完结…学志伟话斋！